قصيدة للشهيد صدام حسين/الشاعر عباس جيجان

وية الفجر بيوم العيد ويّ نحر النحور
صْدام قدم للوطن روحه
إجة مثل الاسد مجروح
يمشي وتضحك جروحه

هم شايف جبل ينكَاد ؟ واذا شفت
الجبل مكَيود تلكَى العلة بسفوحه
مثل النخل مات وكَوف
شاخص شام خص روحه *
لك لو هيج الرجال تموت
لو غم الرجال بموت ماصخ مابه ملوحة

بجيت ومابجيت عليك
بجيت عالزمان الضمّك بلوحه
بجة حتى الفرات عليك
ونهر دجلة انتحر موحه

اذن تستاهل ينوح عليك
شاعر مابطل نوحه
لأن انت الوحيد الذي خليت
المشانق للرجال تصير مرجوحة

رغد يارغد لاتبجين
بس دمعة حزن للزين مسموحة
ابوج الكِتَب اسمه بجبهة التاريخ
كعبة الوطن عنده وعالية سطوحه

الزمن (الوطن) يشهد لأبو الليثين
لو آنة شهادتي بصدام مجروحة
مادنك براسه وانحنى لجلاد
رغم سلسلوا رجله وشدوا جفوفه
رفض يلبس نكَاب الموت
وضحك عالموت سنه وعينّا تشوفه

عجل والله يتباهه يسجل
التاريخ عنه وتكتب حروفه
مو حبل العلى الركَبة طلع ملفوف
ركَبة عالحبل طلعت الملفوفة

اذن حقها العرب تحزن عليه وتنوح
وكَع خيّالها والشمس مكسوفة
من صغره عجيد * عنيد وضد الاستعمار
ابوج الوصل سابع جار معروفه

واذا البصرة حزنت مصباح يوم العيد
يم تكريت طلعت تلطم الكوفة
وجت نينوى محنية الظهر وتصيح
وين ابن الرمادي الباشطة * سيوفه
سواها العلوج ودنسوا بغداد
وعاصمة الرشيد اصبحت مجتوفة

اذن تستاهل عليك ينوح
شاعر مابطل نوحه
لأن انت الوحيد الذي خليت
المشانق للرجال تصير مرجوحة

نقلت هذة القصيدة عن دورية العراق وقد سمعتها أكثر من مرة كما فعل السيد مشرف الدورية وقد ترد بعض الكلمات والاوزان على خلاف ماورد في الاصل ومبعث ذلك صعوبة التركيز على الصوت من االرابط الاصلي

http://media.abolkhaseb.net/sound/abas_sadam.mp4